Motivado por un crecente interese nos valiosos consellos gardados en antigos documentos sobre interpretación e teoría musical, Fernando Santiago comeza a estudar os manuscritos e impresións orixinais dos séculos XVIII e XIX durante os últimos anos dos seus estudos no Real Conservatorio de Música da Haia (Países Baixos).
Presenta en numerosos recitais un amplo repertorio que inclúe música de compositores como L. Boccherini, W. A. Mozart, L. van Beethoven, J. N. Hummel, A. F. Servais, F. Schubert ou F. Chopin con instrumentos históricos, comezando pouco a pouco a explorar o repertorio para violoncelo cada vez maís temperán, pasando polas arquicoñecidas suites para violoncelo só de J. S. Bach até chegar ás composicións de G. B. Vitali, A. M. Fioré, D. Galli ou D. Gabrielli.
Posteriormente e, acompañado polo seu baixo de violín, un instrumento precursor do violoncelo como se entende hoxe en día, estuda a obra de compositores do século XVII como G. Frescobaldi ou B. de Selma y Salaverde.
Na actualidade interpreta un extenso repertorio que abrangue o período 1630-1850 sempre con instrumentos e arcos da época, seguindo as técnicas musicais e instrumentais de cada período.
Fernando Santiago (violoncello barroco)
Profesor na Escola Superior de Música e Artes do Espetáculo do Porto, Fernando é frecuentemente convidado para impartir clases maxistrais e cursos de perfeccionamento en institucións como o Conservatorio Superior de Música da Coruña, o Conservatorio Profesional de Música de Santiago de Compostela, a Asociación de Violoncelistas de Galicia (Soncello), o Instituto Politécnico de Porto ou o Curso de Música Antiga de Agolada. Conclúe con distinción os seus estudos de violoncelo cun minor en pedagoxía no Koninklijk Conservatorium Den Haag cos mestres Lucia Swarts, Dmitri Ferschtman e Anner Bylsma e na Universidade das Artes de Tokio con Hidemi Suzuki. Ten colaborado con músicos como Lucy van Dael, Emma Kirkby, Vera Beths, Chiara Banchini ou Barthold Kuijken, aparecendo en recitais a só, música de cámara e en orquestras por diversos países en Europa e Asia.
